You must enable JavaScript to view this site.
This site uses cookies. By continuing to browse the site you are agreeing to our use of cookies. Review our legal notice and privacy policy for more details.
Close
Homepage > Other Languages > Tetum > Timor-Leste: Rekonsiliasaun no Fila Hikas Mai husi Indonézia

Timor-Leste: Rekonsiliasaun no Fila Hikas Mai husi Indonézia

Dili/Bruxelas, 18 Abríl 2011: Repatriasaun ba eis refujiadu rihun ba rihun ne’ebé mak halai sai hodi hakur fronteira husi Timor-Leste ba iha Indonézia depoizde referendu tinan 1999 nian ne’e tenke enkorraja husi governu rua ne’e nu’udár pasu seluk ida hodi hakat ba rekonsiliasaun ne’ebé kle’an liután.

Timor-Leste: Rekonsiliasaun no Fila Hikas Mai husi Indonézia, informasaun ikusliu husi the International Crisis Group, analiza oinsá mak faktór balun tahan netik hela refujiadu restu sira seluk ne’ebé mak karik atraidu atu fila hikas mai Timor-Leste nu’udár rezultadu ida husi aumentu iha nasaun ne’e ninia estabilidade polítika no prosperidade krexente. Sente-tauk ba politizasaun, baze legal ida ne’ebé la klaru hodi husik hela Indonézia, no mós preokupasaun sira katak sei laiha garantia ba asesu ba propriedade no direitu polítika báziku sira ne’e mak sakar-netik poténsia sira ba repatriasaun nian.

“Repatriasaun hirak-ne’e tenke enkorraja husi nasaun rua ne’e nu’udár oportunidade di’ak ida atu promove rekonsiliasaun entre komunidade rua ne’ebé mak haketak husi fronteira,” dehan Cillian Nolan, Analista Crisis Group nian ba Sudeste Aziátiku. “Maibé hodi halo ida-ne’e sei hatudu kustu sira husi impunidade ba violénsia ne’ebé mak akontese durante referendu tinan 1999 nian no mós realsa fallansu atu implementa rekomendasaun prátika sira husi komisaun verdade rua, Timor-Leste nia CAVR no Komisaun Verdade no Amizade bilaterál ne’ebé kria ona hamutuk ho Indonézia”.

Minoria ki’ik husi eis milísia no líder pró-integrasaun sira atus balun mak politiza ona kestaun kona-bá fila hikas nian. Sira buka atu hetan garantia katak sira sei la hetan prosesu ba akuzasaun kona-bá krime sira hasoru umanidade nian no sira mós hakarak atu hetan rekoñesimentu nu’udár “vítima polítika” husi Indonézia nia retirada. Eis milísia sira la hamosu tán ona ameasa seguransa ruma ba Timor-Leste tanba sira agora dezarmadu no iha partikulár rekoñese independénsia nu’udár verdade ne’ebé irrevizível. Maibé per-spetiva ba sira nia fila hikas ne’e sai polítikamente esploziva ba nasaun ne’e, partikularmente iha auzénsia husi prosesu julgamentu nian. Maski lideransa polítika Timor-Leste nian subliña fila-fila ona katak “oda-matan nakloke nafatin” no polísia no mós líder komunitáriu sira rekoñese kona-bá nesesidade atu garantia seguransa ba ema hirak ne’ebé fila hikas mai, sei iha nafatin sinál sira ne’ebé hatudu katak sei sai susar atu asegura direitu báziku husi eis apoiante integrasaun nian sira.

Serbisu hamutuk ho Indonézia atu estabelese prosesu formál ida sei sai nu’udár meiu ida ne’ebé di’ak liu-hotu atu de-politiza natureza husi repatriasaun nian no mós hamenus influénsia polítika saida mak eis milísia no líder pró-autonomia nian sira sei iha. Ne’e sei suporta esforsu rekonsiliasaun nian sira ba prazu naruk nian mezmu nu’udár implementasaun ba rekomendasaun prátika sira husi Timor-Leste nia ko-misaun rua ne’ebé mak sai retarda ona. Ne’e presiza atu akompaña ho esforsu renovadu sira ba rekonsili-asaun iha nível komunitária nian no mós monitorizasaun rigorozu ba fila hikas nian, atu asegura katak ema hirak ne’ebé mak involve iha violénsia nível ki’ik nian ka ema hirak ne’ebé mak ninia auzénsia sei hamosu deskonfiansa sei bele atu reintegradu. Ne’e mós sei presiza polítika ida ne’ebé klaru kona-bá oinsá mak atu trata ho prosesu julgamentu sira nune’e mós investigasaun sira ne’ebé mak seidauk kompleta.

Ba Timor-Leste rasik, hodi desidi kona-bá saida mak realmente nia signifika atu serbisu ba ka alkansa  justisa no rekonsiliasaun ne’e sei la fásil tanba dalabarak iha diferensa ne’ebé luan tebes entre ninia lideransa no sidadaun sira nia perspetiva nune’e mós entre atór no vítima sira. Pergunta difísil hanesan-ne’e presiza atu responde hodi tau iha konta rede ida husi interese konkorente sira ne’ebé mak hamosu ona husi konflitu iha dékada barabarak nia laran. Timor-Leste hakarak relasaun sira ne’ebé di’ak ho ninia viziñu ne’ebé boot liuhotu, maibé mós polítika interna nian ne’ebé estável.

“Status ne’ebé seidauk rezolvidu husi eis refujiadu rihun ba rihun ne’ebé mak halai sai hodi hakur fronteira depoizde votasaun ida ba independénsia nian iha tinan 1999 sei sai nafatin nu’udár dezafiu ida ba Timor-Leste nia estabilidade prazu naruk nian”, dehan Crisis Group nia Diretór ba Projetu Sudeste Aziátiku nian, Jim Della-Giacoma. “Nasaun ne’e labele ona atu atraza tán diskusaun ne’ebé luan kona-bá solusaun sira ba problema urjente ida-ne’e”.

 
This page in:
English